Oilaviy nizoda da’volar qanday dalillar bilan isbotlanadi?

Фарзандини "болалар неврози" қилган ота хотинини айблаб судга берди

Тасаввур қилинг, уйингизнинг ҳар бир бурчагида сизни кузатувчи камералар бор. Тез-тез фолбинлик қилувчи қайнопалар назорати остидасиз. Ота-онангиз билан кўришиш, ҳатто телефонда гаплашиш ҳам тақиқланган. Охири чидолмай, бу "қамоқхона"дан қочиб чиқасиз. Аммо эрингиз сизни бутун маҳаллага шарманда қилиб, “боланинг бармоғига нина тиққан ваҳший, енгил табиатли аёл” деб судга беради. Даҳшатли, тўғрими?

Яқинда фуқаролик судида худди шундай шов-шувли иш кўрилди. Ажрашмоқчи бўлган ота хотинини оналик ҳуқуқидан чеклаб, қизчасини тортиб олмоқчи бўлди. У далил сифатида хотинининг телефонидан яширинча олинган аллақандай СМСлар, ўз қариндошларининг сўзлари ва боланинг танасидаги кичик бир кўкариш ҳақидаги экспертиза хулосасини судга тақдим этди.

Бироқ, сайёр суд мажлисида эркакнинг ўзи қурган тузоқ чилпарчин бўлди. Маҳалла раиси ва қўшнилар аёлни эмас, балки айнан эрни фош қилишди. Маълум бўлишича, эр хотинини йиллаб уйга қамаб, ота-онаси билан кўриштирмаган. Фарзандини эса онасига қарши шу даражада ёмонлаб, қўрқитганки, тиббий текширувда қизалоққа "болалар неврози" ташхиси қўйилган. Эр хотинини "енгил табиатли" деб айблаган бўлса-да, судга бирорта расмий далил келтира олмади. Суд отанинг туҳматга тўла даъвосини мутлақо рад этди.

Суд жараёнида шахсий гумонлар, СМС скриншотлари ёки қариндошларнинг сўзлари далил бўлолмайди. Айблов қўйдингизми - уни расмий ва инкор этиб бўлмайдиган фактлар билан исботланг. Ажрашиш пайтида болани сохта даъволар билан онадан айиришга уриниш фақат боланинг соғлиғини зарарлайди ва қонун олдида бундай найранглар ҳеч қачон ўтмайди.

👉 https://t.me/dominion_legist